La industria actual traxo la posibilidá de facer producción a gran escala y consiguió acabar, na mayoría los casos, cola antigua industria artesana tradicional. Esta circunstancia, xunto col descubrimientu de nuevos materiales que dexen nel escaezu a los usaos históricamente, fizo guardar nel bagul de les alcordances munchos oficios tradicionales. Too esto acarrió l'abandonu y estrozu de les ferramientes y construcciones auxiliares utilizaes nestos oficios.

Nos nuestros paseos pelos praos de Prevera podemos reparar en restos d'estes construcciones que, por cuenta de que dexaron de ser útiles, tán siendo abandonaes inevitablemente. Dientro d'esta arquitectura popular secundaria podemos ver los fornos de cal, esto ye, les caleres, que yeren el llugar onde unos artesanos llamaos caleros convertíen la piedra caliar en cal sometiéndolo a un tratamientu térmicu.

Hasta la revolución industrial y el descubrimientu del cementu, nel 1824 en Portland, Inglaterra, el cal foi ún de los materiales principales qu¿usaben na construcción entemecío con arena. Mesmamente, el cal, entemecío con arena fino,  yera usao pa revoques que daben una protección estra a la paré frente a los elementos esternos y  amás cumplía una función estética.

Tamién foi usao como pintura y desinfestante, funciones qu'agora faen les pintures sintétiques y los desinfestantes actuales..

Amás, la producción actual de cal fáenla n'industries modernes coles que la fabricación artesanal nun pue competir. El cal ye responsable de la solidez de los edificios antiguos y medieval y participó n'obres tan prestixoses como nos frescos y estucaos que los engalanen. La calidá del cal varia según la roca d'onde se saca. Les caliares más pures daben los cales más grasos y de les que teníen más magria, salíen los cales magros

Los fornos tán siempre allugaos en zones onde abonden les dos materies primes necesaries: piedra caliar y combustibles. La piedra caliar ye un elementu sólidu de color ablancazáu de la que la so base ye'l carbonatu de calciu.