Ta allugada nel barriu L'Alto la Ilesia d'esa parroquia. Llegamos a ella pela AS-110, Candás-Tabaza, y nel PK 4,400 tomamos la esviación señalizada escontra L'Altu de la Ilesia y dempués de 800 m. garramos la dirección señalizada como "La Iglesia", a unos 200 m. del esvíu. Los viales d'accesu son d'asfaltu en bon estáu de caltenimientu.

L'aspectu de la construcción, d'estilu románicu, ye bonu dempués de que se remocicare'l 24-06-99, tres un conveniu ente la Conseyería de Cultura y el Conceyu de Carreño.

Santa María d'El Pieloro/Piedeloro ye'l templu románicu más importante de Carreño y, anque poles reformes, remocicamientos y cambios nun se caltién na so totalidá, ta declarada bien d'interés cultural.

D'ella dicíen que ye ún de los meyores templos de les ilesies medievales asturianes porque la so decoración nun ye solo simbólica, sinón claramente esotérica o máxica y bien val contemplala con enfotu Permanecen como elementos auténticos dos portaes y l'arcu del trunfu. Esta Ilesia d'estilu románicu ta fechada nel sieglu XIII y consta d'una nave, de la que los sos elementos más importantes son la cabecera y les portaes oeste y sur. Nos sieglos XIII XIV alzaron l'actual capiya mayor (d'estilu protogóticu), que sustituyó al ábside románicu orixinariu.

A finales del sieglu XVI alzaron la capiya de Nuestra Señora de les Nieves, alzada pol patronalgu particular, y xunto a la muria meridional de la capiya mayor.

Nos sieglos XVII y XVIII, na dómina barroca, acometiéronse numberoses obres de reforma: construyéronse bóvedes de lladriyu na nave (pa lo que  tuvieron que llevantar pilastres nel so interior pa suxetar los arcos de refuerzu), y coles mesmes construyóse un pórticu, la espadaña y la sacristía, nel llugar onde enantes se llevantara la capiya de Nuestra Señora de les Nieves.

Nel 1936, nel intre de la guerra civil española, la ilesia foi quemada y los sos bienes destruyíos, ente ellos cuatro retablos barrocos: el retablu de la capiya mayor (1716), el retablu del Santísimu Cristu (1709), el retablu de San Blas (1726) y el retablu de Nuestra Señora de les Nieves, de la capiya del mesmu nome. Nel 1939, Luis Menéndez Pidal redactó'l proyectu de reconstrucción de la ilesia, que foi acometida na década del 1940.

Pero les intervenciones sobre ella nun quedaron ende, nel 1980 sustituyeron la cubierta, nel 1985 ficieron llabores restauradores al igual que nel 1998, con intervención arqueolóxica incluyida. Si facemos un análisis más fondu del edificiu y la so decoración, podemos dicir que consta d'una sola nave rectangular con coru y una capiya mayor; nave y capiya mayor tán dixebraes por un arcu de trunfu de mediu puntu..

La nave ta cubierta con bóveda de cañón de llunetos y la capiya mayor con bóveda de crucería ñervada. Apegaos a la ilesia tán la sacristía (al llau sur), el cabildu (llau oeste), el pórticu (llau sur) y el campusantu (llau norte).

Les muries son de mampostería y úsense contrafuertes esteriores axuntaos a la nave, con una función estética (característica que remite al arte prerrománicu asturianu). El pisu ye de piedra caliar, recubiertu de madera en delles partes de la nave.

La portada occidental tien disposición abocinada y ta formada por tres arquivoltes de mediu puntu, sofitaes en tres pares de columnes. Cubre esta portada un bistechu sosteníu por modillones. La decoración d'esta portada ye bien rica: motivos xeométricos, escenes simbóliques, etc. La portada meridional tien disposición abocinada, con dos arquivoltes apuntaes sutilmente. Dambes portaes escarecen de tímpanu, característica habitual de los templos románicos asturianos.

L'arcu de trunfu, que da pasu a la capiya mayor, ye un arcu llixeramente apuntáu con tres arquivoltes apoyaes sobre columnes, de les que que los sos capiteles tán decoraos con motivos vexetales.

Como festividaes na parroquia, ta la de San Blas, que se celebra'l 3 de febreru con actos relixosos y les Sacramentales que se celebren el tercer domingu d'agostu, onde amás de los actos relixosos y la romería faen un importante concursu d'esposición de ganáu.