La fonte-llavaderu La Pipera ta en San zabornín. Ye un elementu de grandes dimensiones en forma de "L", cola fonte nel puntu entemediu de la mesma.

La fonte termina en forma de frontón arrondáu nel que podemos atopar dellos adornos esculpíos na piedra. Tien un únicu cañu y una pila de recoyida d'agua. El llavaderu cuenta con dos altures, la parte trasera más alta tien amás, la función de muria de contención pa los posibles argayos de tierra; la parte d'abaxo tien dos partes estremaes dafechu.
Una d'elles, el llavaderu como tal, tien 4 llavaderes y l'otra podría ser un bebederu.

Ente les actuaciones que se van facer, destaca l'acondicionamientu de la redolada del conxuntu col fin de crear na so parte frontal una superficie que facilite l'accesu y l'estancia nel mesmu, realizando pa ello pequeños movimientos de tierra y colocando pisu recubiertu de baldoses de piedra natural. Va intentase recuperar el manantial d'agua que d'antiguo abastecía a la fonte cola execución d'arquetes y canalizaciones y van reconstruyise con fábrica de lladriyu les moldures del frontón y la pila de recoyida d'agua.