Esta casa podemos atopala nel barriu La Nonzalera, al que llegamos al traviés de la carretera CE-3, que podemos garrar dende la carretera Lluanco/Luanco-Xixón/Gijón al altor de La Residencia, en Perlora.

La casa data del 1893, los sos primeros propietarios pertenecieron a la familia Arrinda y darréu, la vivienda pasó a otros propietarios, dalgunu de los que, y por referencies orales, sabemos que yeren indianos.

L'estilu de la casa, anque ye bien imprecisu, podría incluyise dientro del eclecticismu de raigañu colonial.

La vivienda ta asitiada nuna esplotación agropecuaria típica cola que choca esta casa bien engolada, anque de tamañu bien menguáu. La estructura cuadrangular ruempe con una entrada avanzada que tuvo de contar nel so día con una antoxana agora perdida y una escalera simple.

El teyáu, bastante planu, presenta bufarda y un bistechu saliente sosteníu por modillones neoclásicos y con una decoración de gotes y triglifos; esti detalle, xuntu col blanquiáu y les moldures, da-y un aire híbrido, ente villa colonial y casa-granxa, bien peculiar