Ta asitiáu nel barriu Sebades nu 5 de Llorgozana. Podemos aportar al llugar dende l'AS-19 Xixón/Gijón-Avilés, onde nel PK 12,400, tomamos el ramal a la derecha de tremáu asfálticu y en circulando unos 300 m. llegamos al palaciu.

Ye'l palaciu de la familia más importante del conceyu, familia del llinaxe de los Carreño, del que nacieron personaxes tan pernomaos como:

• D. Álvaro de Carreño, guerreru de los tiempos d'Alfonso II El Castu, al que se-y atribúi un amañu asemeyáu a la del caballu de Troya pero con carros, onde consiguió arrampuñar a los moros la plaza de Carrión de los Condes.
• D. Fernando Carreño, constructor del castiellu de La Mota, en Medina del Campo.
• D. Juan Carreño Miranda, pintor de la cámara del rei Carlos II.
• D. Rodrigo de Carreño, ayalgueru xeneral del Principáu d'Asturies.

L'estáu que presenta esti palaciu na actualidá ye aceptable gracies a los remocicamientos que se-y van faciendo nos últimos tiempos y que tán, sobre manera, rellacionaos col arreglu del teyáu y la meyora de la cara esterior. Caltién una puerta de mediu puntu del sieglu XII y otra d'arcu apuntáu (oxival) del XIV, enantes tenía una torre que foi destruyida por un rayu'l sieglu pasáu. Tien una ermita que paez que ta dedicada a Nuestra Señora.de la O.

De la so fábrica primitiva caltiénense dos puertes, una principal na paré del noroeste, de mediu puntu y que data del sieglu XIII y otra al sureste d'arcu apuntáu.

Na so fachada entá se caltién un escudu: cuatro carteles con armes de Carreño, Alas y Casamayor. Yelmu engalanáu na parte cimera.